哈哈，第一次寫食評係因為：繼Runnung Man之後，近日又迷上了另一個真人show節目－MasterChef。令我好想周圍去啲餐廰食野，試下做食家。今次就同班friend去左位於尖沙咀－Tasting Room Cocktail Kitchen最初諗住係美麗華商場入面，應該好易去。誰不知佢個門口較細，又係個corner位度，被前面間日式餐廳阻擋視線。令我搵左兩次先搵到個門口。如果大家要去，真係要掙大隻眼望入啲。不過間餐廰橫裝都不錯，氣氛舒適。唔知係咪因為難搵，入面唔多人；同男女朋友去靜靜的食飯都ok。Waiter多數係非本身人，所以要用英文溝通。但佢地英文唔算太好，要慢慢清楚咁講佢地知。
講返正題。我地一行5人，因有coupon，所以送左一客水牛芝士配番茄(免費)。味道淡淡的，作為前菜是一個不錯的選擇。分菜時，發現唔係每一portion都配有oregano。我個人覺得若配上oregano既香草味，味覺會更豐富。小小的一片，味道唔會太濃，更好食。
另一道係今日我地特選此餐廰的原因之一，就係36個月西班牙黑毛豬風乾火腿 Iberico Ham (Spain) ($70/20gm)。初試 Iberico Ham，我地order左 20gm share一齊試。可能因為剛病完，口淡淡，所以唔覺得太salty，配上唔太甜既哈密瓜，味道剛剛好。 不過，唔知係咪我一向牙力較差，咬到最後啲根位，我唔太咬成散，要成塊吞。另外，有朋友覺得再配合沙律菜食咬感會更豐富。食Ham就當然要配支白酒($440)一起品嚐。由於我本身唔太識飲酒，而且本身怕苦，暫時仲未懂得分出單寧(Tannin)與Dry既分別。只係支酒唔對我黎講唔算易入口，男仔就覺得還可以。
另一款前菜﹣牛油果雞心豆蓉配農夫包多士($70)。一時無留心菜名係農夫包多士，以為係農夫包，所以其份量比想像中細份，感覺價錢有少少不合理。最怕啲包久放，沒再烤焗，硬硬的一塊。幸好，這裏的多士尚算香脆，中間軟身。配有兩個sauce，一個係menu介紹的牛油果雞心豆蓉，另一個係新鮮蕃茄醬。先試牛油果雞心豆蓉，醬比較結身，無咩味道。而鮮蕃茄醬既稀結度調則較得不錯；但兩個sauce既欠缺seasoning。我個人認為牛油果雞心豆蓉最少可再加多少少salt提升牛油果既味道，而鮮蕃茄醬可以加少少salt同糖以加強味道。Main Course選左兩個：
海鮮紅花意大利寬麵配日本海膽忌廉汁($148)因無印象品嚐過紅花（Saffron），所以都算係特地order。但感覺無什麼特別，亦唔見紅花在哪兒；所以上菜時已經忘記了有紅花一事。紅花會令汁偏紅，但可能暗黃燈關係，所以果汁依然係黃色的。唔知係果汁係用海膽調味關係，果味有少少腥，不過還可以接受。寬麵係Homemade，唔會太厚身，不錯。海鮮方面，烹煮時間剛好，不會過老，吃上口柔軟。當中有兩隻蛤蠣，之前係電視旅遊節目聽過，蛤蠣比一般沙蛤含有較多水份。我一咬，的確係一大泡水係入面，啲水會有少少鮮。如果之前無聽過介紹，我會以為無煮熟 XDD
扒澳洲羊扒配意大利蘋果黑醋汁($268)
羊扒唔會太多肥膏或根位，用料唔差。羊扒亦煎得唔錯，剛剛好，肉質柔軟。意大利蘋果黑醋汁我就唔係好feel到。呢道菜既配菜反而最令我地感到驚喜！特別係半煎焗既薯條，煮得很淋身，但又能保持一整條，唔會一夾就散；而且好入味又唔會覺得油。真係值得一讚！
撰文 ､ 攝影：Joey
餐廰：Tasting Room Cocktail Kitchen
地址：尖沙咀彌敦道132號美麗華商場2樓2015號鋪
類別：多國菜 / 西餐廰
人數：5位
價錢：$180/人 (連加一及會員優惠)
留言
發佈留言